Во близина на мобилната галерија во Градскиот парк денеска ќе се одржи куклена претстава „Реткото момче и зборливото балонче”, по повод меѓународниот Ден на ХАЕ – 16 мај, со цел на забавен начин да им се доближат на најмалите чувствата кои ги имаат децата со ретката состојба и битките, но и начинот на кој излегуваат на крај со својата ситуација.

Настанот е организиран од страна на Здружението на пациенти со хередитарен ангиоедем (ХАЕ) Македонија  во соработка со „Тактус” – Здружение за развој на културно уметнички вредности.

Здружението ХАЕ Македонија деновиве низ неколку активности сака да ја зголеми свесноста за оваа ретка генетска состојба. Шеснаесетиот ден во месецот мај во 2012 година беше прогласен за меѓународен Ден на ХАЕ, па така низ многу активности насекаде низ светот, токму на овој ден се зголемуваат можностите за запознавање со ова ретко и потенцијално животозагрозувачко заболување.

– Со цел подигнување на свесноста за ХАЕ во регионот, Здружението ХАЕ Македонија организира изработка на албум во кое учество зедоа повеќе држави од Југоисточна Европа. Насловот на албумот „ Во секое лошо има нешто добро (Every cloud has a silver lining)” на симболичен начин прикажува дека да се има дијагноза не е најстрашното што можело да се случи и дека и покрај предизвиците, сите во оваа битка сме се соочиле и со позитивни страни на нашите приказни, запознавање на силни и единствени луѓе, среќавајќи и други борци кои ни биле инспирација, продолжувајќи ја битката за некој друг, посочија од Здружението ХАЕ.