Кратовци прославуваа со компиријада
Во Кратово денеска се одржа традиционалната културна манифестација „Компиријада 2022“.
Настанот во организација на Општина Кратово се реализира под покровителство на Министерството за земјоделство, шумарство и водостопанство.
– На централниот градски плоштад беа поставени десетина уредени штандови со традиционална храна направена од компир. Многубројни специјалитети, различни вкусови, слатки и солени, беа достапни за дегустација од страна на бројните туристи и посетители, но и на кратовчани, изјави Катерина Станковиќ од локалната самоуправа на Општина Кратово.
Според градоначалникот на Кратово, Тодорче Николовски, манифестацијата привлекла голем број посетители кои дегустирале специјалитети направени од компир.
Општината додели и награди за најдобро уреден штанд и најдобар специјалитет.