Кошаркарите од утре ги започнуваат подготовките за „меурот“ во Естонија
Машката сениорска репрезентација на Македонија утре ќе ги започне мини-подготовките за ноемврискиот ФИБА прозорец, и натпреварите на турнирот кои ќе се играат во „меурот“ во Талин, Естонија.
Првиот собир, селекторот Александар Тодоров ќе го има утре во 18. часот во малата сала на СЦ „Јане Сандански“, каде ќе се тренира се до предвиденото заминување за Естонија.
Комплетниот список на кандидати кои ќе бидат вклучени во работата со сениорската репрезентација во овој циклус од квалификациите за Европското првенство во 2022 година, ќе биде официјализиран откако ќе бидат извршени задолжителните тестирања на коронавирусот.
Во Скопје ќе бидат одработени вкупно четири тренинзи, а на 23. ноември, во раните утрински часови е планирано тргнувањето за Талин.