Селекцијата на Шпанија ја победи Аргентина со 81:71 во второто коло од груата Ц на Игрите во Токио. Со оваа победа „црвената фурија“ си обезбеди пасман во нокаут фазата бидејќи има две победи по две кола и во последното коло од групната фаза ќе игра против Словенија за првото место. Аргентина и Јапонија имаат по два порази и во меѓусебната пресметка ќе го бараат пласманот во следната фаза.

Слично како и во финалето на Мундијалот во 2019 година, Шпанија немаше големи проблеми против Аргентинците. „Гаучосите“ подобро го започнаа натпреварот и поведоа со 12:3, но Шпанија брзо успеа да се врати во игра и прашање на време беше кога ќе воспостави контрола и врз резултатот и врз играта. Тоа се случи пред крајот на полувремето кога со серија од 7:0, Шпанија дојде до предност од 40:34 и до крајот на средбата не го испушти водството.

Најзаслужен за победата на Шпанија беше Рики Рубио со 26 поени и пет скокови, додека Серхио Љуљ даде 10 поени. Кај Аргентинците најдобар беше Никола Лапровитола со 27 постигнати поени.