Тренерот на Интер, Антонио Конте, сака дополнително да ги мотивира своите фудбалери пред утрешното финале и изјави дека само победниците се паметат.

Конте кој има искуство од настапи во финални натпревари како фудбалер, сега кога е тренер сака да ги види мотовирани и своите играчи бидејќи за противник имаат тим кој е специјалист за ЛЕ, Севиља дури пет пати триумфира во ова натпреварување во последните 15 години.

– Играв многу финалиња како фудбалер, победував но и губев во нив. Луѓето паметат само кога ќе победите. Ја освоив Лигата на шампионите, но исто така загубив три пати во финалето. Во историјата се памети само титулата, мора да бидеме горди бидејќи ова е прво финале за Интер по 10 години. Историјата ја пишуваат победниците и тоа треба да претставува дополнителна мотивација за сите нас – вели Конте.

Тренерот на Интер е убеден дека неговите фудбалери го мислат и чувствуваат како и тој, дека нема страв од Севиља.
– Ќе дадеме се од себе да ги израдуваме навивачите, клубот… Зборот страв не постои во мојот речник. Ја почитуваме Севиља и нејзината историја, ги респектираме, но ние сме во финалето бидејќи имаме свои карти кои треба да ги одиграме – изјави Конте.