Престижната британска етикета „Лин рекордс“ го објави албумот „Македонисимо“, зад кој стојат македонскиот врвен пијанист Симон Трпчески и неговите музички пријатели.

На овој албум на многу уникатен начин се обработува македонската народна музика од страна на македонскиот композитор Панде Шахов, кој со својот посебен музички јазик ја обои на многу поинаков начин, испреплетувајќи ја со различни музички стилови. Уникатниот тим на пријатели го сочинуваат Александар Краповски на виолина, Александар Сомов од Бугарија на виолончело, на кларинет, саксофон и на кавал Хидан Мамудов, а зад ударалките е Влатко Нушев.

На изданието работеа продуцентот Џереми Хејс и инженерот за звук Бен Конелан. Албумот е снимен во Сафолк во Источна Англија.

– Неизмерно сум среќен што по тригодишното нижење на сиот тој материјал на концертните сцени низ целиот свет, дојде денот да се појави на носач на звук, кој на сите луѓе што го или не го слушнале на концертите во живо, ќе им овозможи тоа да го сторат и на композициите да им се навратат кога ќе посакаат – изјавил Трпчески по излегувањето на албумот.

(Текстот е објавен во „Културен печат“ број 48, во печатеното издание на „Слободен печат“ на 12-13 септември 2020)