Археолозите открија антички натписи во Големата пирамида во Египет за кои тврдат дека потврдуваат кој ја изградил пред 4.500 години. Ова не биле, како што тврдат теоретичарите на заговор, вонземјани или џиновски суштества. Но, приказните за античките Грци, кои рекле дека овој неверојатен споменик го изградиле 100.000 робови кои работеле во тримесечни смени во текот на 20 години, исто така не се вистинити.

Имено, новите откритија во Големата (Кеопсова) пирамида го променија наративот, покажувајќи дека ја изградиле платени, квалификувани работници кои работеле континуирано, со еден слободен ден на секои десет дена.

Египтологот д-р Захи Хавас и неговиот тим неодамна истражуваа серија тесни комори над Кралската комора и пронајдоа претходно невидени траги оставени од работници од 13 век п.н.е., објавува египетскиот Nilefm.com- пренесува Нова.рс.Тие, исто така, открија гробници јужно од пирамидата – вечните почивалишта на квалификувани работници, со статуи што ги прикажуваат како работат на каменот и 21 хиероглифски наслови како што се „надзорник на страната на пирамидата“ и „занаетчија“.

„Овие откритија потврдуваат дека градителите не биле робови. Да биле, никогаш немаше да бидат погребани во сенката на пирамидите“, рече д-р Хавас за време на епизода од подкастот Limitless на Мет Бил.

Најновите откритија, исто така, фрлаат нова светлина врз начинот на кој е изградена пирамидата. Варовник од каменолом оддалечен само 300 метри бил транспортиран на локацијата со помош на рампа направена од урнатини и кал, чии остатоци биле пронајдени југозападно од споменикот. Д-р Хавас сега работи на нова експедиција што ќе донесе робот во Големата пирамида – означувајќи го првото ископување во структурата во модерната историја.

Големата пирамида во Гиза е најголемата египетска пирамида, а ја изградил фараонот Куфу (Кеопс), кој владеел за време на Четвртата династија на Старото Кралство. Таа е една од трите пирамиди на платото Гиза – заедно со пирамидите на Хафре и Микерин – а тука е и познатата Голема Сфинга.

За време на подкастот, Хавас покажа фотографии кои никогаш порано не биле достапни за јавноста, истакнувајќи ги имињата врежани на карпата.

„Тие беа пронајдени во комори до кои е тешко и опасно да се стигне, а се напишани во стилови што можат точно да ги толкуваат само обучени египтолози“, рече Хавас.

Тој призна дека некои европски посетители во 18-ти и 19-ти век успеале да влезат во тие комори и да ги остават своите имиња врежани во каменот.

„Но, натписите што ги пронајдовме се очигледно многу постари – тие се оригинални графити на антички египетски работници“, додаде Хавас.

Покрај тие натписи, друго важно откритие беа токму гробниците на градителите на пирамидата.

Хавас и неговиот тим, исто така, пронајдоа алатки во гробниците – како што се кремени и камења за удирање – кои веројатно биле користени во изградбата на пирамидата.

„Основата на Големата пирамида е направена од цврста карпа, закопана 8,5 метри во земјата“, рече тој.

Ова значи дека откако ја обележале квадратната основа, работниците ги сечеле сите четири страни од карпата сè додека не создале рамна платформа за темел – без никакви блокови.

„Сè уште може да се види денес на јужната страна од Кеопсовата пирамида.“

Тој продолжил објаснувајќи дека работниците биле поделени во тимови – некои го сечеле каменот, други го обликувале, а трети го транспортирале материјалот на дрвени санки што ги влечеле по песокот.

Додаде дека блоковите биле подигнати со помош на рампи, за што, според него, пронашол докази.

„Рампата сигурно водела од југозападниот агол на пирамидата и се поврзувала со каменоломот“, објаснил Хавас.

„Ја ископавме областа и на местото означено со C2 ги пронајдовме остатоците од рампата – чакал измешан со песок и кал. Кога рампата била демонтирана, не ги отстраниле сите траги, а она што останало – тоа е она што го најдовме.“

Неговиот колега, Марк Ленер, ископал источно од пирамидата и открил она што го нарекуваат „град на работниците“.

Пронајдени се предмети што се користеле за сортирање риба, пекара, барака и населба каде што живееле работниците.

„Постои популарен мит дека работниците јаделе само лук, кромид и леб – но ние најдовме илјадници животински коски на локацијата“, рече Хавас.

Експерт од Универзитетот во Чикаго ги анализирал и открил дека Египќаните колеле 11 крави и 33 кози секој ден за да ги прехранат работниците – „што било доволно за околу 10.000 луѓе дневно“.