Инспирирана од делата и животот на шведската сликарка Берта Хансон, од нејзините писма и записите во нејзиниот дневник, писателката Сара Лундберг ја создава топлата и волшебно раскажана книга „Птицата во мене лета каде што ќе посака“.

„За ликот на Берта употребив модел од стварноста. Сакав да доловам чувство на ранливост, на живот што пулсира, на крв што струи под кожата. Да ги покажам варијациите во бојата, во сенките, во температурата. Како понекогаш кожата блеска“, објаснува авторката Сара Лундберг.

За „Птицата во мене лета каде што ќе посака“ Сара Лундберг го има добиено најпрестижното шведско признание за книжевност, наградата „Аугуст“. Авторката Сара Лундберг студирала на Кралската уметничка академија во Стокхолм, а своите дела ги има изложувано на триесетина самостојни и групни изложби во Шведска и низ светот. Активно работи како илустраторка на книги.

Книгата на македонски јазик е објавена како дел од проектот „Европски приказни на надеж“ на издавачката куќа „Артконект“, поддржан од програмата „Креативна Европа“ на Европската Унија. Преводот е на Родна Русковска.

(Текстот е објавен во „Културен печат“ број 106, во печатеното издание на весникот „Слободен печат“ на 20-21 ноември 2021)