Книга на месецот во Градската библиотека во Скопје е романот „Писмо за Глорија“ на Живко Грозданоски
Книга на месецот во Градската библиотека „Браќа Миладиновци“ во Скопје е „Писмо за Глорија“ на Живко Грозданоски. Изборот на книгата е во рамките на големата кампања „Читаме современи македонски автори“ што Библиотеката ја спроведува веќе втора година како поддршка на домашната издавачка продукција и промоцијата на македонскиот јазик.
Романот „Писмо за Глорија“, издание на „Или-или“, е слоевито дело кое, меѓу другото, говори и за пишувањето како еден вид терапија.
– Романот се роди од белешки, од потребата да пишувам за себе, за прифаќањето. Многу од тие приказни се и автобиографски и автофикциски. Во книгата пишувањето е и прифаќање и терапија и простување и исцелување. Тоа, пак, ме донесе до ново поглавје во пишувањето – работилници за автофикциски расказ како терапевтско средство – подвлече Живко Грозданоски во разговор за книгата „Писмо за Глорија“ што се одржа во Градската библиотека.
Живко Грозданоски е роден во 1986 година во Кичево. Основно училиште завршил во Бигор Доленци и во Кичево, средно во Скопје. Дипломирал на Катедрата по италијански јазик и книжевност. Пишува проза и книжевност за деца.
Неговите кратки раскази се преведени на десетина јазици, а неговите романи се преведени на бугарски („Куфер за тројца“, „Или-или“, 2014) и на италијански („Последното име на иднината“, „Антолог“, 2018).
Преведува и препејува од и на италијански јазик. Член е на Друштвото на писателите на Македонија и на Здружението на преведувачи на Македонија (ЗПРМ).
(Текстот е објавен во „Културен печат“ број 226, во печатеното издание на весникот „Слободен печат“ на 13-14.4.2024)