Кивито е многу вкусно овошје со киселкаст вкус, кое е здраво да се јаде. Ова овошје со карактеристични плодови е богато со многу важни микроелементи и минерали, како и со витамините А, Б и Ц.

Интересно е тоа што малкумина знаат дека само едно киви на ден ја задоволува дневната потреба од витамин Ц. Тоа воедно помага во подобрување на имунитетот и отпорноста на организмот кон
различни видови инфекции.

Холестеролот во организмот има важна улога за работа на органите, бидејќи е дел од многу важни процеси во организмот. Тој може да се подели на добар и лош, а високото ниво на вториот може да доведе до заболувања на кардиоваскуларниот систем. За да може да се контролира нивото на холестерол во крвта, лекарите препишуваат различни медикаменти, како и диети за негово намалување. Медикаментозната терапија може да се замени со народната медицина, во која многу плодови и зеленчуци помагаат во намалување на високиот холестерол.

Еден од популарните начини е редовно јадење киви. Актинидинот е уникатен ензим што го содржи ова овошје, а истовремено има способност да влијае врз намалување на штетниот холестерол. Покрај тоа кивито содржи целулоза, која го помага согорувањето на маснотиите и намалување на холестеролот во крвта. Но, при негова консумација треба да внимаваат луѓето што имаат гастрит поради зголеменото ниво на киселост кај кивито, како и луѓето што имаат други проблеми со гастроинтестиналниот тракт.

Искористете го за омекнување месо

Кивито во кулинарството освен за десерти се користи за омекнување риби и месо, а тоа е благодарение на ензимот актинидин што го прави месото помеко. Освен како свежо овошје, тоа може да се консумира и преработено. Најчесто се суши и се користи за правење разни сирупи, слатки, кремови, мармалади, салати, сладоледи и други јадења и пијалаци. Со киви се прават диететски сокови, безалкохолни коктели во комбинација со други видови овошје, алкохолни коктели
кои содржат бурбон, кампари и текила. Исто така, се користи за декорација на торти, палачинки, овошни салати, кремови и друго.

Како лесно да го излупите

Она што за многумина е проблем е лупењето на кивито. Тоа има специфична влакнеста и многу тенка кора. Колку е позрело, толку е потешко да се излупи, затоа што во најголем процент содржи вода. Кога ќе решите да јадете киви има повеќе варијанти за лупење, но кој е најлесниот, без да го оштетите овошјето?

Една од варијантите е со обичен нож или ноже за овошје да се излупи кората и да се јаде она што ќе остане од него, бидејќи вака се оштетува месестиот дел. Друга варијанта е исто добро позната, а се прави со лажица. Прво кивито се сече на пола и потоа со лажица внимателно се поминува покрај кората, да се одвои месестиот дел. И последната варијанта е малку чудна, но соодветна ако го користите кивито за овошна салата. И за овој начин прво треба да го исечете кивито на пола, а потоа маталка од миксер ставете ја внатре и завртете еднаш, така што ќе се одвои кората од месестиот дел. На овој начин воедно добивате и киви исечкано на парченца.