Со специјален лет на „Air China”, утрово во Атина пристигнаа осум тони медицински материјали и опрема, помош од Кина за Грција, а беа пречекани и примени од неколку министри од грчката Влада, јави дописничката на МИА од Атина.

Станува збор еден милион медицински и хируршки маски, медицински ракавици, заштитни очила, медицински заштитни комбинезони, заштитни очила, за еднократна употреба и сл, наменети за грчките болници.

Половина од помошта е од кинеската Влада, а другата половина од кинеската компанија „State Grid”, која поседува 24 отсто од акциите во грчкиот независен оператор за пренос на електрична енергија.

На малата свеченост на примо – предавањето на помошта на атинскиот аеродром, од грчката Влада  присуствуваа министрите за здравство, за енергија и животна средина, државниот министер, алтернативниот министер за надворешни работи, како и генералниот секретар за меѓународни економски односи во грчкото МНР, додека пак од кинеска страна, амбасадорката на Кина во Атина.

Министерот за здравство на Грција, Василис Кикиљас и алтернативниот шеф на грчката дипломатија Милтиадис Варвициотис истакнаа дека е особено важна помошта од Кина.