Киелце е пресилен, деветти пораз на Еурофарм Пелистер во Лигата на шампионите
Еурофарм Пелистер и во деветтото коло од групата „А“ е совладан во ракометната ЕХФ Лига на шампионите откако денеска во Полска загуби убедливо со 35:25 од Киелце.
Актуелниот македонски првак единствено водеше на самиот старт со 1:0 и 2:1, а потоа Полјаците до самиот крај на средбата го контролираа водството.
Најпрвин домаќините имаа предност од 6:3, па постепено одржуваа три-четири голови разлика, а непосредно пред паузата имаа и највисоки 18:12 во првото полувреме.
Во вториот дел само константно растеше предноста на Киелце кој отиде и на „двоцифрена“ разлика од 10 голови разлика (26:16) и тука веќе сите дилеми беа решени околу крајниот исход.
За Еурофарм Пелистер најефикасен беше Цехте со седум погодоци, пет запиша Пешевски, а по четири Борзаш и Радивојевиќ.
На табелата Киелце после петтата победа е на третата позиција со 12 бодови, колку што има и второпласираниот Алборг, а водечки е Кил со 13. Еурофарм Пелистер е на последната осма позиција без бодови.
Следниот меч играчите на тренерот Бранислав Ангеловски ќе го имаат на 7 декември во Битола против ППД Загреб.