Канаваро: Наполи е блиску до Скудетото благодарение на Спалети
Поранешниот италијански репрезентативец Фабио Канаваро вели дека сезонава е поразлична и дека Наполи со своите игри заслужи да биде моментно убедливо на првото место во Серија А со 17 бодови повеќе од второпласираниот Лацио на седум кола до крајот на сезоната.
Поранешниот светски шампион со „аѕурите“ во интервјуто за „Гаѕета дело Спорт“ ја анализираше сезоната на Наполи.
– Скудето? Оваа титула е комплетно различна приказна во споредба со претходните. Доминацијата на Наполи ги натера другите клубови да се фокусираат на различни цели. Претходните две титули на Наполи во 1987 и 1990 година имаат уникатен, извонреден бренд: Марадона. Ова Скудето, пак, има многу лица и заслугата е пред сè на Лучијано Спалети – вели Канаваро.
Потоа, вниманието на Канаваро се префрла на Виктор Осимен и Квича Кварацхелија, столбовите на Наполи.
– Двајцата се многу силни, но воглавно Спалети направи една натпреварувачка група со исклучителен континуитет“. Спалети претстави одлична игра и тимска рамнотежа. Не само што игра меѓународен фудбал, туку е ефикасен и успешен. Затоа што многумина се обидуваат, малкумина успеваат. Тој постигна нешто во што можеби не веруваше на почетокот – рече Канаваро.