Српскиот кошаркар, Никола Јокиќ, кој вчера беше избран во најдобрата петорка во НБА лигата, потврди дека ќе игра за својата репрезентација на Светското првенство во Кина.
Тој во изјава за „Тајнуг“ го потврди тоа што со денови се шпекулираше, дека ќе биде дел од репрезентацијата на Србија на Мундобаскетот во Кина.

– Многу сум задоволен за тоа како ја одиграв сезонава во НБА лигата. Имав одлична година во која настапив на Ол стар натпреварот и бев избран во првата петорка на лигата. За мене круна на сезоната ќе претставува медалот за кој сум сигурен дека репрезентацијата на Србија може да го освои на СП и подготвен сум да дадам се од себе за да ја оствариме целта – изјави Јокиќ за „Танјуг“.

Светското првенство во Кина ќе се игра од 31 август до 15 септември, а селекцијата на Србија се наоѓа во група со Италија, Филипини и Ангола.