Јапонија ги повика своите граѓани во Кина да бидат претпазливи поради тензиите во билатералните односи по коментарите на премиерот Санае Такаичи во врска со Тајван, остров кој Пекинг го смета за свој, пренесува Ројтерс.

„Кога патувате, треба да обрнете посебно внимание на вашата околина, особено на присуството на сомнителни лица. Обидете се да патувате во групи колку што е можно повеќе“, се вели во соопштението објавено на нејзината веб-страница во понеделник.

„Избегнувајте преполни места или места кои веројатно ќе се сметаат за места каде што се собираат Јапонци колку што е можно повеќе “, се додава во соопштението.

Портпаролот на јапонската влада, Минору Кихара, денес изјави дека овие препораки се издадени „врз основа на сеопфатна проценка на политичката ситуација, вклучувајќи ја и безбедносната состојба во земјата или регионот за кој станува збор, како и социјалните услови “.

Кризата во односите меѓу Кина и Јапонија избувна по изјавите на Такаичи на 7 ноември, според кои секој воен напад врз Тајван би можел да оправда испраќање јапонски трупи да го бранат островот според принципот на „колективна самоодбрана“, предвиден во јапонскиот закон усвоен во 2015 година.

Кина го смета Тајван за своја покраина , која сè уште не успеала да ја обедини со остатокот од земјата од крајот на граѓанската војна во 1949 година. Покрај тоа, Пекинг не ја исклучи можноста за прибегнување кон сила за да ја врати контролата врз Тајван, а воедно да го интензивира воениот притисок врз островот. Кинеската амбасада во Токио ги опиша изјавите на Такаичи како „отворено провокативни“ , сметајќи дека тие „сериозно ја оштетуваат климата на размена меѓу народите“.

Во објава на Икс, која оттогаш е избришана, генералниот конзул на Кина во Осака, Хуи Џиан, се закани дека „валканото грло вклучено (во надворешните работи) мора да биде отсечено без ни најмало двоумење “. Токио и Пекинг веднаш ги повикаа своите амбасадори на консултации.

Ескалација на тензиите

Во обид да ги намали тензиите, Масааки Канаи, висок функционер во јапонското Министерство за надворешни работи одговорен за Азиско-пацифичкиот регион, вчера пристигна во Пекинг, а денес отиде во кинеското Министерство за надворешни работи, според новинската агенција Џиџи. Таму треба да се сретне со својот колега Лиу Џинсонг.

Предупредувањето објавено на веб-страницата на јапонската амбасада, исто така, им советува на јапонските граѓани да „ги почитуваат локалните обичаи и да бидат внимателни со своите зборови и однесување кога комуницираат со локалното население“.

„Ако видите лице или група што изгледа сомнително, веднаш оддалечете се и напуштете ја областа“, се вели во соопштението.

Ескалацијата на билатералните односи предизвикува стравувања од сериозни економски последици. Пекинг ги повика кинеските граѓани да избегнуваат патувања во Јапонија , што предизвика пад на цените на јапонските акции поврзани со туризмот и малопродажбата во четврток. Двете најголеми економии во Азија се тесно поврзани, а Кина е најголемиот извор на странски туристи во Јапонија.

Во првите девет месеци од 2025 година, архипелагот пречекал 7,5 милиони кинески туристи, според официјалните јапонски податоци, што е зголемување од 42% на годишно ниво, при што овој број претставува една четвртина од странските туристи кои ја посетиле Јапонија. Покрај тоа, Кинезите потрошиле еквивалент на 3,28 милијарди евра во Јапонија во третиот квартал од годината.

Веќе во текот на викендот, најголемите кинески авиокомпании им понудија на своите клиенти целосно да ги компензираат за билетите што ги купиле за Јапонија.

Во исто време, Пекинг објави дека го одложува прикажувањето на најмалку два јапонски филма во кинеските кина, како што објави синоќа весникот „China Film News“, кој е под надзор на официјална кинеска организација.

Пред да ја преземе функцијата на 21 октомври, Такаичи се сметаше за ултраконзервативна, „јастреб“ во односите со Пекинг, и редовно го посетуваше споменикот Јасукуни, кој им оддава почит на јапонските жртви во Втората светска војна, вклучувајќи 14 осудени воени злосторници.

Кина ги смета ваквите посети за „сериозни провокации“.