Изложба во „Ко-Ра“: Архивирано време и простор
Самостојната фотографска изложба „Лица и улици“ од Никола Јовановиќ е поставена во Галерија „Ко-Ра“, мал салон, при ЈУ Дом на култура „Кочо Рацин“ во Скопје. Изложени се 55 фотографии настанати во периодот 2019-2021 година, а инспирирани од урбаното катадневие на Скопје. На фотографиите се претставени лица од јавниот и културниот живот на градот од повеќе генерации и во најразлични амбиенти.
„Фотографите говорат за животот што пулсира со својот ритам и обилството разнородни специфики и сегменти од колективната меморија, а кои успева да го долови токму објективот на младиот фотограф, притоа укажувајќи на моќта на фотографијата, која е застапена во сите сегменти на денешницата, но добивајќи едновремено и аура на архивирано време и простор“, забележала Виолета Калиќ, историчарка на уметноста.
Станува збор за прва самостојна изложба на младиот фотограф Никола Јовановиќ, кој завршува 4 година на одделот за мултимедија во ДСУЛУД „Лазар Личеноски“ во Скопје, изучувајќи ја две години и формално фотографијата како предмет кај професорот Боро Арсовски.
(Текстот е објавен во „Културен печат“ број 71, во печатеното издание на „Слободен печат“ на 6-7 март 2021)