Веднаш, практично од првата минута, на својот „камбек“ во националната машка сениорска кошаркарска селекција на Македонија, Итан Хап покажа дека ќе биде и тоа како големо засилување во составот кој го има на располагање новиот селектор, Жозеп Марија Берокал.

Американецот со македонски пасош, реализираше дабл-дабл од 15 поени и 14 скока на дуелот со Луксембург кој го решивме во наша корист со сигурни 79:70.

– Игравме силно, тренерот направи одлична работа со подготовките цела недела, асистентите исто така, но најважно е што ние ги исполнивме целите. Секој поен е важен, но најважно е што победивме. Луксембург е добар тим, а ние имаме нов селектор и сè уште се обидуваме да се вклопиме на неговата филозофија, а имавме само четири заеднички денови за подготовките – вели Хап.

Воедно, по натпреварот кажа дека е значајно присуството на еден од најдобрите македонски кошаркари во националниот тим Андреј Јакимовски кој беше прв стрелец во победата над Луксембург запишувајќи 17 поени, седум скока и четири асистенции.

– Имавме големи падови, а за да се победат поголеми репрезентации, мора да играме на исто ниво 40 минути. Овој тим има голем талент, Андреј Јакимовски не беше тука минатиот пат кога играв, неговото присуство е од големо значење и навистина е значаен дел од овој тим – рече Хап по третиот триумф во групата „А“ од претквалификациите за Евробаскетот 2029.