Позната по својата едноставна префинетост, таа е пример за жена која изгледа одлично како однадвор, така и однатре.

Ирена Спировска, освен што може да се пофали со својата харизма и шарм, и нејзиниот изглед е на завидно ниво. Убавата фигура ја одржува со правилна исхрана и редовна физичка активност, најмногу со планинарење, кое стана неизбежен дел од нејзиниот живот.

За ваквиот изглед сигурно играат улога и гените, но и посветеноста на Ирена на здравиот начин на живот – балансирана исхрана и физичка активност. Можеби ќе помислите дека за ваков изглед е потребно многу труд, напор и откажувања, но Ирена ќе ве разувери во тоа, сѐ додека тоа што го правите, го правите со љубов кон својата душа и тело.

Овојпат со убавата водителка разговаравме за исхраната, за тоа дека секој организам е приказна за себе и дека не постои единствена формула во врска со исхраната која треба да се следи. Најважно е да уживате во здравиот дух и тело.

Секојдневен утрински ритуал

На Ирена денот ѝ започнува со ритуал кој е здрав и ѝ обезбедува доволно енергија за обврските во текот на денот.

– Секојдневен ритуал ми е наутро да се напијам чаша вода со Хербалајф алое вера, а потоа подготвувам и пијам смуди од сезонско овошје во кое најчесто додавам ленено семе и чија, понекогаш додавам и растителен протеин. Дури потоа го пијам првото утринско кафе (кафето го пијам без шеќер, но му додавам оризово млеко). Во текот на претпладневните часови за ужина јадам јаткасто овошје, а ако почувствувам желба за благо, јадам црно чоколадо.

Ирена долги години е вегетаријанка, па следствено на тоа и нејзиното мени се состои од здрави намирници коишто не се од животинско потекло.

– Вегетаријанец сум, така што ручекот обично ми се состои од салати и јадења како грав, леќа, спанаќ, ориз, одвреме-навреме риба, морски плодови… За вечера најчесто јадам италијански тестенини/паста во комбинација со чаша бело вино – вели убавата водителка.

Како изгледа исхраната на Ирена, дали се храни здраво или, пак, не може да им одолее на убавите, но калорични јадења и деликатеси?

– Заради вегетаријанскиот начин на исхрана на моето мени доминираат овошјето и зеленчукот, освен тоа, се трудам да пијам многу вода, не пијам газирани сокови, а млечни производи консумирам во ограничени количини. Од слатките деликатеси слабост ми се штрудла со јаболки, сладолед и баклава – додава Ирена.

Противник на диетите

Што се однесува до држењето диети, Ирена е категорична во тој поглед. Таа е противник на диетите, за што има и вистинско објаснување.

– Никогаш не сум држела диета, сметам дека здравата и избалансирана исхрана е многу подобар начин да се одржува линијата отколку наменските диети кои најчесто даваат само привремени резултати – вели Ирена.

Наместо на исцрпувачките диети, Ирена за здрав организам и убаво тело, предност секогаш ѝ дава на физичката активност. Познато е дека нејзина пасија е планинарењето, па затоа секој слободен миг го користи да се искачи на некоја планина, врв, со што си пружа благодат и на душата и на телото.

– Физичката активност е многу важна за благосостојбата на организмот на секој човек без разлика на возраста што ја имаме. Спортот придонесува да бидеме витални, да имаме добра кондиција, а притоа ни помага и да изгледаме добро. Омилен начин на рекреација и трошење калории ми е планинарењето – вели водителката.

Дали Ирена има некој трик или совет за мотивација за физичка активност и за правилна исхрана?
Ирена вели дека постојат две девизи коишто ги почитува:

– Не е важно колку јадеш, туку што јадеш.
– Ако држите диети ќе изгледате добро во вашата облека, но ако спортувате ќе изгледате одлично и кога сте без облека.

Што претставува храната за Ирена и како таа ја доживува?

– Храната може да биде лек, но и отров за телото. Од нас зависи дали преку храната ќе му дадеме сила и енергија на нашето тело или ќе го обремениме со непотребни маснотии, калории и штетни состојки – вели Ирена.

Што се однесува до тоа која храна односно јадење ѝ е омилено, на прво место на нејзиното мени се секогаш салатите.

– Ги обожавам салатите и можам да ги јадам во неограничени количини. Сакам необични комбинации во кои може да додадете разни семња, суво овошје, јаткасти плодови (лешници, бадеми, ореви), тестенини или варени житарки – вели водителката и додава која храна избегнува да ја консумира.

„Избегнувам да јадам леб, месо воопшто не јадам и внимавам да не претерувам кога јадам благо.“

Секој има некој свој мал ритуал при јадењето, особено кога е главниот оброк во прашање. Кај Ирена тој ритуал е една своевидна традиција за нашето поднебје.

– Секогаш ручекот го започнувам со салата и чашка ракија, тој ритуал ми е поважен и од самиот ручек односно од главниот оброк – заклучува убавата водителка.

Салата од авокадо

Ирена со вас сподели еден од нејзините омилени рецепти. Оваа салата, покрај тоа што е брза и лесна за подготовка, содржи намирници богати со хранливи материи кои брзо согоруваат и во исто време даваат чувство на ситост, па нема да имате налети на глад, а ќе со обезбедите супердоза на витамини и минерали.

Потребни состојки:

– зрело авокадо
– млад кромид
– маслинки
– брокула
– семки од тиква/сончоглед
– ореви
– чија
– магдонос (по желба)
– маслиново масло
– сок од лимон
– зачин провансалски микс

Измешајте ги сите намирници и уживајте во единствениот вкус на оваа салата!