Неколку илјади Израелци вечерва демонстрираа во Тел Авив против владата на Бенјамин Нетанјаху, обвинувајќи го премиерот дека лошо се грижи за безбедноста и барајќи нови избори.

Во изминатите стотина дена против израелската влада демонстрираа главно роднините на заложниците на Хамас, но веќе се повикува и на оставка на Нетанјаху поради лошото владеење. Демонстрантите вееле израелски знамиња и биеле во тапани.

– Владата нѐ напушти на 7 октомври и продолжува да нѐ напушта секој ден. Ги напушта оние што беа раселени од северот (поради нападите од Хезболах), семејствата на жртвите, резервистите и заложниците. Ние имаме моќ за да ја промениме и да ја средиме ситуацијата. Оваа влада мора да си оди, веднаш – им порачала од говорница на демонстрантите Ноам Алон, чиј брат загинал при воена операција за чистење на терористи од израелски град.

Наспроти протестите, аналитичари укажуваат дека позицијата на Нетанјаху не е загрозена и тој е цврсто на челото на воениот кабинет. Опозициските лидери безуспешно се обидоа да поттикнат формирање влада на национално единство, на чие чело не би бил Нетанјаху.