Во финалето во женска конкуренција на грен слем турнирот „Ролан Гарос“ Ига Швјонтек со резултат 2:1 (6:2, 5:7, 6:4) во сетови ја совлада Каролина Мухова за два часа и 49 минути игра.

Полската тенисерка убедливо стартуваше во мечот откако го освои првиот сет со 6:2. Фуриозно Швјонтек го започна и вториот сет со 3:0 и тука после еден час игра веќе како да се најавуваше победникот.

Но, потоа на сцена стапи Мухова која покажа многу подобри перформанси, не само што успеа да се врати и израмни двапати на 3:3 и 4:4, туку и да поведе (5:4).

Следуваше ново израмнување за 5:5, а потоа следните два гема ги доби чешката тенисерка за израмнување во сетови на 1:1.

Продолжи низата на гемови Мухова и на стартот од третиот сет кога стекна предност од 2:0, следуваа три врзани гема на фаворитката Швјонтек, но не се предаваше Мухова која возврати за минимална позитива од 4:3 и тоа после нов брејк.

Го врати брејкот полската тенисерка за 4:4, па го искористи нејзиниот сервис за 5:4. Победникот беше решен во 10 гем кога Швјонтек направи нов брејк за победа и освојување на титулата.

Ова е трета титула за Швјонтек на „Ролан Гарос“, претходните две ги освои во 2020 и 2022 година.