ИБМ го суспендираше рекламирањето на Икс, порано познат како Твитер, откако во нивниот нов извештај се вели дека нејзините реклами биле поставени покрај објавите во кои се фалат Адолф Хитлер и нацизмот. Компанијата рече дека е „целосно неприфатливо“ нејзината содржина да се појавува во такви објави на платформата. Икс соопшти дека намерно не става брендови „до ваков вид на содржина“, пишува Би-Би-Си.

Левичарското набљудувачко тело Медиа Матерс објави дека пронашло реклами купени од ИБМ и други компании до објави, вклучувајќи и цитати за Хитлер, пофалби за нацистите и негирањето на Холокаустот.

Една пронацистичка објава што била прикажана до реклама на ИБМ била видена околу осум илјади пати, соопштија од Икс во изјава за Би-Би-Си. Другите фирми кои се наведени ги вклучуваат Епл, Оракл, телевизиската мрежа Браво и телекомуникациската компанија Иксфинити.

„ИБМ има нулта толеранција за говор на омраза и дискриминација и веднаш ги прекинавме сите реклами на Икс додека ја истражуваме оваа целосно неприфатлива ситуација“, се вели во соопштението на компанијата.

Од Икс изјавија за Би-Би-Си дека рекламите не се намерно поставени покрај екстремистичка содржина, дека профилите што промовираат нацисти нема да заработуваат од рекламирање и дека конкретните објави ќе бидат означени како „чувствителни содржини“.

„Ставот на Икс отсекогаш бил многу јасен дека дискриминацијата од секого треба да престане насекаде – мислам дека тоа е нешто за што сите можеме и треба да се согласиме“, објави во четвртокот извршниата директорка Линда Јакарино.