Хрватски компании преку нашите платформи веќе почнаа да објавуваат огласи за привлекување работна сила за претстојната сезона. Првите странски гости тие ги очекуваат уште од мај, а со оглед на големиот недостиг на работници во цела Европа, тие сакаат навреме да се обезбедат со работници. Обично се нуди сместување, патни трошоци, административни трошоци, а обезбедено им е и осигурување на работниците што ќе прифатат работа во оваа земја членка на ЕУ.

Не само што почнуваат да се бараат работници за хотели и угостителски објекти, туку почна потрагата и по кадар за продавници, но и за градежниот сектор, кој е поактивен како доаѓа потоплото време.

Групацијата „Луксузни јадрански хотели“ ги повикува сите заинтересирани да дојдат на отворен ден за работа в четврток во хотелот „Холидеј ин“.

– Дојдете во четврток на 26.1.2023 година во 10 часот во хотел „Холидеј ин“ во Скопје, каде што со кафе и разговор можете да ги добиете сите информации – пишува во огласот на сајтот Вработување.

Работодавачот информира дека „сѐ што се бара од кандидатите е волја за работа на Јадранското крајбрежје, а пожелно е на отворениот ден со себе да имаат и своја биографија. Се бараат келнери, бармени, готвачи, помошници во кујна, слаткари, собари, хигиеничари, работници во домаќинства.  Во огласот е потенцирано дека е обезбедено сместување, два бесплатни оброка, работодавачот ги покрива трошоците и посредува при добивање на работната дозвола, надоместок на патните трошоци од работното место до сместувањето, надоместок на патните трошоци од Македонија до Дубровник, како и летни бонуси покрај редовната плата.

„Слободен печат“ разговараше со граѓани што минатата година работеа на хрватското приморје. Искуствата се различни. Едни велат дека може да се заработи и да се однесе нешто дома, но дека станува збор за голема експлоатација на работен труд, работа прекувремено и без ден за одмор. Но, наидовме и на соговорници што веќе се пакуваат за оваа дестинација и кои размислуваат таму да останат за постојано, па и да си ги повлечат семејствата.

– И овде работев по цел ден, но не заработував како во Хрватска. Таму се нуди многу работа и веќе преговарам за работа и за мојата сопруга, па ако може и постојано да се преселиме – вели нашиот соговорник.

Според информациите, минатото лето таму келнерите земаа по 1.000 евра плата, со платен престој и два оброка, а дополнително земаа и бакшиш. Собарици може да земат околу 600-700 евра, готвачите имаа плати и до 3.000 евра месечно. Минатогодишните наши сезонци во Хрватска објаснуваат дека додека престојувале таму, имале и привремена лична карта, односно дека нивниот престој целосно бил регулиран.

Работници од Македонија бара и трговскиот синџир „Томи“ за своите продавници во Тар, Робињ, островот Крк, Раб, во Јасенице, Вир, Нин, Привлака, Ражанац, Стариград Пакленица, Селине, Водице… Според огласот, се нуди квалитетно сместување и надоместок за теренска работа. Платата не е напишана, а се бараат продавачи, магационери и месар.

Оние што се заинтересирани за градежништво, поточно да ги средат патиштата пред сезоната во Хрватска и во Словенија, може да работат на инсталација на заштитни мрежи, бариери за заштита од одрони, панели за заштита од бучава, бетонирање, фугирање и дупчење. Работните дозволи ќе им бидат средени и како што пишува во огласот на фирмата „Монтера“, ќе имаат редовна плата – но колкава, и оваа фирма не наведува.

Истовремено додека хрватските компании бараат работници од Македонија, македонските газди, пак, велат дека не можат да најдат работна сила дома и бараат олеснување на престој и работа на странски државјани во нашата земја.