Исламистите од „Хамас“, кои владеат во Појасот Газа, и нивните секуларни ривали од „Фатах“, кои управуваат со Западниот брег, се согласија за одржување на избори на палестинските територии во рок од шест месеци.

Изборите ќе бидат закажани во рок од шест месеци, согласно договорот што го постигнаа лидерот на „Фатах“, Махмуд Абас и политичкиот шеф на „Хамас“, Исмаил Ханије.

– Се согласивме прво да одржиме парламентарни избори, потоа претседателски избори на палестинските власти и на крајот централен совет на Палестинската ослободителна организација, рече Џибрил Раџуб, висок функционер на „Фатах“.

Последните палестински парламентарни избори се одржаа во 2006 година, кога неочекувано победи „Хамас“. Салех ал-Арури, висок претставник на Хамас, изјави дека договорот е постигнат за време на состаноците одржани во Турција.