Груби: Опозицијата да не нè држи во заложништво, пратениците ќе добијат пет предлог-закони со европско знаменце
Мора да биде јасно дека роковите апсолутно не нè газат, бидејќи Договорот е потпишан во согласност со постојното законодавство. Во него нема конкретен датум, а пеналите како збор не постојат. Но, ако сакаме побрза градба, ќе мора да пристапиме кон измена на законите, посочи вицепремиерот Артан Груби
Пет предлог-закони усвоила Владата и тие ќе им бидат доставени на пратениците со европско знаменце, соопшти првиот вицепремиер Артан Груби на прес-конференција, замолувајќи ги пратениците да не ја поскапуваат изградбата на автопатските делници од коридорите 8 и 10-д, кои ќе ги гради американско-турскиот конзорциум „Бехтел и Енка“. Тој повтори дека граѓаните не смеат да изгубат уште две години и 150 милиони евра средства од Буџетот, заради дневнополитичките поени на опозицијата. Според Груби, пратениците треба да решат дали ќе градиме побрзо или поевтино, или поскапо и побавно. Инаку, првиот вицепремиер им се извини на новинарите и на јавноста, ако како Влада не успеале во целост, доволно јасно да ги претстави одредбите од потпишаниот Договор со конзорциумот „Бехтел и Енка“.
– Опозицијата ги држи блокирани осумте закони што ги предложивме за да имаме побрза и поефикасна градба. Измените на законите не ги бараат „Бехтел и Енка“, туку државата, институциите и индустријата. Досега имавме неколку средби со координаторите на политичките партии и предлагавме законите да бидат ставени на дневен ред на собраниските комисии, но ВМРО-ДПМНЕ не сака да не слушне и ги блокира законите. Затоа Владата на седница усвои 5 предлог-закони кои ќе бидат доставени во Собранието со европско знаменце. Мора да биде јасно дека роковите апсолутно не нè газат, бидејќи Договорот е потпишан во согласност со постојното законодавство. Во него нема конкретен датум, а пенали – како збор не постојат. Но, ако сакаме побрза градба ќе мора да пристапиме кон измена на законите – посочи Груби.
Според министерот за транспорт Благој Бочварски, Македонија веќе нема време за калкулации за тоа какви автопатишта ни требаат. „Бехтел и Енка“ почнала со мобилизација, наскоро ќе стартува и проектирањето, а на 12 мај ќе почне и градбата на делницата Прилеп – Битола.
– Мора да решиме дали ќе останеме заобиколница во Европа или ќе бидеме крстосница за паневропските коридори. Соседите се далеку пред нас и лесно може да се случи дел од коридорите да се преместат на друга траса. Со измените и дополнувањата на Законот за урбанистичко планирање се уредува нов модел на планирање и градење, кој првпат ќе се користи кај нас и кој би ги дал најбрзите и најоптималните резултати во изградбата на патната мрежа за реализација на Коридорот 8 и Коридорот 10-д. Градби од стратегиски интерес се само оние државни патишта и магистрални гасоводи, чија изградба како градби од јавен интерес е предвидена со урбанистички проект за градби од стратегиски интерес – појасни Бочварски.
За министерот за финансии Фатмир Бесими е важно дека ниедна компанија не е ослободена од данок на личен доход и персоналец, туку ќе бидат ослободени од давачките за промет, за поевтина и побрза градба. Според Енвер Хусејин, заменик-министер за труд и социјала, во измените на Законот за работни односи, се зборува за прекувремена работа, која отсекогаш постоела во градежништвото, а тоа не значи 60 часа неделно и не значи дека во текот на целата година ќе има толку работа за нив.
– Зборуваме за дополнителна, прекувремена работа во целата година. Но знаете дека во градежниот сектор сè зависи од временските услови, што значи дека ќе има и денови кога нема да се работи и ќе нема потреба од прекувремена работа. Секој работник ќе потпише договор и никој нема сосила да работи, а ќе има и слободен работен ден – рече Хусејин.
Ејуп Рустеми, директор на ЈПДП, рече дека имаат доволно капацитети и ќе се вработат нови 28 лица, поголем број инженери, архитекти, електроинженери и инженери еколози, кои ќе го сочинуваат посебниот тим што ќе ја следи реализацијата на проектот.
– Со формирањето на посебниот тим, ќе бидеме целосно екипирани и подготвени – оцени Рустеми.
Груби информира дека владината седница почнала со изразување едноминутно молчење за загинатите во двата немили настана во Србија, како и дека сите домашни ресорни министерства известиле за нивните тековни напори да не се случи такво нешто во земјава.