Претседателот на Фудбалската федерација на Италија, Габриеле Гравина му даде поддршка на селекторот Роберто Манчини и покрај поразот од Македонија што значеше крај за надежите на „аѕурите“ за настап на Светското првенство во Катар.

Гравина изјави дека сака Манчини да остане селектор и да не си поднесува оставка.

– Се надевам дека Манчини ќе ја продолжи својата мисија и ќе остане на селекторската функција – изјави Гравина.

Италија во четвртокот во Палермо загуби од Македонија со 1:0 благодарение на голот Александар Трајковски и ги остави „аѕурите“  по втор пат по ред да го пропуштат СП.

– Минатото лето се радувавме бидејќи станавме европски шампиони и со задоволство ги прифативме сите пофалби. Сега мораме да бидеме доволно силни и да истрпиме критиките бидејќи ги заслужуваме истите. Но, го гледаме Манчини и во иднина како селектор – додаде Гравина.

Роберто Манчини седна на клупата на „аѕурите“ во 2018 година и минатата година стана европски шампион откако на „Вембли“ во Лондон ја совлада Англија во финалето.