Новак Ѓоковиќ во понеделник го започнува настапот на УС Опен, последниот грен слен турнир во годината на кој ќе се обиде да собори два рекорди, првиот е да го освои календарскиот слем, односно да победи на четирите најголеми тениски турнири во една година, а вториот е да стане тенисер со највеќе грен слем титули.

Моментно Ѓоковиќ, Рафаел Надал и Федерер имаат по 20 грен слем трофеи.
Противник во првото коло ќе му биде 18-годишниот дански тенисер Холгер Руне, а српскиот тенисер на прес-конференцијата пред стартот на грен слем турнирот зборуваше за календарскиот слем.

– Тоа е лесно прашање, да, календарскиот слем би бил најголем успех во мојата кариера. Знам дека имам голема шанса во Њујорк каде во минатото играв добро. Публиката се враќа на трибините и едвај чекам турнирот да започне. Но, одиме удар по удар. Сонувам да го освојам календарскиот слем. Знам како ментално да се носам со големите очекувања, но притисокот е огромен. Но, во исто време притисокот е привилегија, секој ден работиме за да дојдеме до шанса да освоиме грен слем или да испишеме историја – изјави Ѓоковиќ.

Нападот на трофејот кој може да го запише во историјата, на Ѓоковиќ се очекува да биде полесен бидејќи ги нема неговите најголеми ривали Рафаел Надал и Рожер Федерер како и минатогодинешниот шампион Доминик Тим.

– Се чувствува тоа, го нема ниту Тим. Но, тука се квалитетни тенисери како Зверев, Медведев, Циципас и тоа се тројцата главни конкуренти. Грен слем е грен слем – додаде Ѓоковиќ.

Новинарите исто така ги интересираше во кој момент Новак сфати дека е можно да се освои календарскиот слем.
– Откако победив во Австралија, ја започнав годината со титула. Сепак. Ролан Гарос за мене беше најголема препрека, откако го освоив Париз си помислив: Во ред, немам многу време за подготовка за Вимблдон. Но, секако шансите на Вимблдон ми беа поголеми отколку на Ролан Гарос. Да, тоа би бил моментот кога помислив дека е можно да се освои календарскиот слем – додаде Ѓоковиќ.