Крводарителските акции и покрај пандемијата во земјава се одвиваат со несмален интензитет. Институтот за трансфузиона медицина во соработка со Црвениот крст, а и со поддршка од хумани граѓани ширум земјава, успеваат да ги соберат планираните количества на крв, крвна плазма и други крвни продукти неопходни за итни операции на пациентите во здравствениот систем.

Крводарителската акција во Жан Митрев Клиник организирана од Blood Bank Tenk ќе прерасне во традиционална и ќе се одржува двапати годишно.

Во првата акција од ваков вид, тиесетина вработени во клиничката болница Жан Митрев, вклучително и самиот доктор Жан Митрев направија место во своите полни работни распореди и даруваа крв која ќе спаси животи.

-Оваа акција е прва од ваков тип но истата благодарение на потпишаниот меморандум за соработка ќе прерасне во традиционална и ќе се одржува двапати годишно, велат од Жан Митрев Клиник.

Граѓаните може да донираат крв и во Институтот за трансфузиона медицина Скопје, секој работен ден од 8 до 18 часот и во Даре Џамбаз секој работен ден од 8 до 15 часот како и во секоја служба низ републиката според тековниот распоред. Минатата недела во соработка со Црвен Крст Кичево, успешно се реализираше крводарителска акција и во овој град.

Институтот за трансфузиона медицина договори и акциски план за организирање на крводарителски акции во средните училишта и на факултетите. Тимската работа е многу важна во служба на промоција и унапредување на крводарителството, велат оттаму. Меѓу групите на граѓани кои дарувале крв изминатиот месец се дарители од Прилеп, еснафи од Старата скопска чаршија, вработени во Царината, клиничкиот центар и приватници.