Фудбалер од Премиер лигата открива: Ќе ме распнат доколку дознаат дека сум хомосексуалец
Англискиот таблоид „Сан“ денеска објави вест со која ја крена јавноста на нозе, а „главен актер“ е фудбалска ѕвезда од Премиер лигата која тврди дека е хомосексуалец.
Таблоидот не го открива идентитетот на фудбалерот, но ја објави неговата наводна исповед во која открива дека ќе биде распнат доколку се дознае за неговата сексуална определеност и дека се плаши да излегува од својот дом поради тоа.
– Живееме во 2021 година и би требало да бидам слободен и на сите да им кажам кој сум, но постојат некои навивачи кои и понатаму како да живеат во 1980-тите години. Сакам да бидам отворен кон луѓето бидејќи тоа сум јас и горд сум на мојата сексуална определеност. Но, вистината е дека ќе бидам распнат – вели фудбалерот хомосексуалец и додава:
– Кога сум на теренот, чувствувам дека играчите можат да погодат дека сум хомосексуалец и да ми судат поради тоа. Се прашувам дали можат да почувствуват такво нешто поради облеката која ја носам. Тоа психички влијаеше на мене и чувството е навистина страшно.
Таблоидот „Сан“ додава дека анонимниот фудбалер зборувал и со Амал Фашану кој е роднина на поранешниот играч на Норич, Џастин Фашану кој во 1990 година призна дека е хомосексулец, но осум години подоцна се самоуби.
Амал основа хуманитарна организација која се бори против хомофобијата и расизмот во спортот.