ФОТО: Живко Мукаетов им честиташе на ракометарите на Алкалоид за остварените резултати годинава
Успешен е првиот дел од оваа натпреварувачка сезона (2023/24) во македонската ракометна Супер лига за екипата на Алкалоид предводена од тренерот Кирил Лазаров во која до сега триумфираше на секој натпревар. Пред одигрувањето на последниот 14 меч в сабота против Тиквеш, РК Алкалоид го освои првото место во групата „А“ и пренесува три бода во плеј-офот.
Денеска од клубот информираат дека играчите беа во посета на Алкалоид АД Скопје. Во рамките на посетата Генералниот директор/Претседател на УО Живко Мукаетов им честиташе на ракометарите за напредокот и за остварените резултати годинава.
За првпат во својата клупска историја, Алкалоид настапи и на меѓународната сцена достојно го презентираше македонскиот ракомет, освои четири бодови во својата група, една победа и реми против шпанската Ла Риоха во Европската лига на ЕХФ.
Исто така екипите во младинските конкуренции, пак, забележаа одлични резултати и веќе се промовираат како носители на македонскиот ракомет, што е и една од стратешките цели на клубот.
– Ние ракометарите и стручниот штаб изразивме голема благодарност до компанијата „Алкалоид“ и до г. Живко Мукаетов за неизмерната поддршка за клубот и најавивме дека овогодишните резултати се поттик и мотив за уште поголеми успеси во периодот што следува. Имавме можност да ги посетиме и производствените капацитети и Центарот за контрола на квалитет во сегментот фармација – информираат од РК Алкалоид.