За време на јавните продажби со наддавање се продава сѐ и сешто – од скапоцени парчиња накит, до уникатни предмети кои имаат голема вредност само поради тоа што своевремено биле во сопственост на познати личности.

Сепак, продажба на исушен лимон, стар 285 години, е навистина несекојдневна случка, пишува „Сан“.

Имено, ова суво цитрусно овошје било пронајдено во стара комода при чистење на куќа од стари предмети. Продавачите го средувале имотот на нивниот вујко и мислеле дека комодата од 19. век може да биде вредна, па ја однеле на аукционер.

Специјалистот го пронашол лимонот во задниот дел од фиоката додека ја фотографирал комодата за продажба.

Пораката издлабена на кората од лимонот гласи: „Дадено од г. П Лу Франчини, на 4 ноември 1739 година, на г-ца Е Бакстер“.

Се верува дека овошјето било донесено во Англија од колонијална Индија, како романтичен подарок.

Аукционерот Дејвид Бретел изјави: „Мислевме дека ќе се забавуваме и ќе го ставиме лимонот на аукција, со проценка дека ќе го продадеме за цена од 40 до 60 фунти“.

Но, лимонот бил продаден за 1.100 фунти во Њупорт, Обединето Кралство, а сосе такси – 1.416 фунти.

Интересно е дека комодата била продадена за само 32 фунти.