ФОТО: Климатски активисти го поткастрија божиќното дрвце пред Бранденбуршката порта
Активисти на групата Последна генерација го пресекоа врвот на божиќното дрвце поставено пред Бранденбуршката порта во центарот на Берлин за да укажат на потребата од порешителни активности против климатските промени.
Активистите со хидрауличен кран се кренале на височина од 15 метри и пресекле парче од 2 метри од врвот на накитената елка. На неговото место тие поставиле транспарент со пораката: „Ова е само врвот на божиќното дрво“. Групата соопшти дека цел на акцијата била да се испрати порака до граѓаните дека „сега го гледаат само врвот од климатската катастрофа што се случува низ светот“, а до владата на канцеларот Олаф Шолц да направи повеќе во борбата против глобалното затоплување.
Полицијата го потврди инцидентот, без да објави дали ќе ги гони „поткаструвачите“, а градските власти не објавија дали ќе го заменат дрвцето.
Групата Последна генерација го привлече вниманието и предизвика гнев во јавноста со низа блокади на патишта, а особено со вандализирање важни уметнички дела во галерии, врз кои активисти фрлаа храна. Реагирајќи на таквите протести, канцеларот Шолц ги повика да престанат со вандализирања и „да бидат покреативни“.
Како изгледаше дрвцето пред и по инцидентот: