Фестивал на краток филм: Во тек е конкурсот за „Филмај 2021“
Фото-кино клубот „Козјак“ од Куманово извести дека од 14 декември 2020 е отворен конкурсот за Третиот меѓународен фестивал на краток филм „Филмај 2021“ и дека пријавувањето ќе трае до 15 март 2021 година. Конкурсот важи за кратки играни и документарни филмови со траење до 20 минути. Ќе се прифаќаат и пријави за експериментални филмови (изземајќи ги анимираните). Филмовите што ќе аплицираат е потребно да се завршени по 1.1.2018 година.
Организаторот одлучил пријавувањето на конкурсот за македонски кратки филмови да биде бесплатно, со намера да се поттикне продукција и нивно прикажување, како и да се создаде и да негува желба кај публиката за гледање кратки филмови.
На фестивалот се доделуваат четири награди: награда „Лазар Ѓорѓевиќ“ за најдобра режија; награда „Радислав Ристевски“ за најдобра фотографија/кинематографија; награда „Koзјак“ за најдобрo сценарио; и награда за најдобар македонски (домашен) филм.
Првото издание на фестивалот се одржа на 29 мај 2019 година, во Занаетчиски дом – Куманово со присуство на публика од 200 луѓе. Второто издание, пак, се одржа на 29 септември 2020 година во големата сала на НУЦК „Трајко Прокопиев“ – Куманово, во согласност со протоколите за заштита од коронавирусот. Третото издание на фестивалот е планирано да се одржи на 28 мај 2021 година.
(Текстот е објавен во „Културен печат“ број 66, во печатеното издание на „Слободен печат“ на 30-31 јануари 2021)