Ферстапен најбрз во квалификациите пред трката за ГН на Канада, Алонсо го освои второто место
Возачот на Ред Бул, Макс Ферстапен, ја освои пол-позицијата пред Големата награда на Канада, деветта трка од овогодинешниот шампионат во Формула 1.
Актуелниот шампион до пол-позицијата дојде со време од 1:21.299 минути, а изненадувачки на второто место се најде Фернандо Алонсо од Алпине. Ова е прв пат по 2012 година Алонсо кој има две титули, да започне една трка од првиот стартен ред. Третото најбрзо време го оствари возачот на Ферари, Карлос Саинс јуниор.
Покрај маестралното возење на Ферстапен по влажната патека, квалификациите ги одбележа и несреќата на неговиот тимски колега Серхио Перез, која предизвика прекин на квалификациите. Мексиканецот изгуби контрола над болидот и удри во заштитната ограда во текот на втората квалификациска сесија и ќе стартува од 14. Позиција на утрешната трка.
Главниот конкурент за Ферстапен, Шарл Леклер трката ќе ја започне од последното место бидејќи ја менуваше електрониката на погонската единица.
Четврто најдобро време оствари седумкратниот шампион Луис Хамилтон, пред импресивните возачи на Хас Кевин Магнусен и Мик Шумахер. Вториот возач на Алпине, Естебан Окон беше седми, Џорџ Расел осми, Даниел Рикардо беше деветти а десети беше Гуанју Џоу.
Трката за Големата награда на Канада ќе започнува во недела во 20 часот.