Познатиот холивудски глумец Ештон Качер има брат близнак, кој е само пет минути помал од него, но иако се близнаци, Ештон и Мајкл се сосема различни.

Мајкл бил големо изненадување за семејството бидејќи родителите дури во подoцната бременост дознаеле дека ќе добијат две бебиња. Близнакот на Ештон бил толку мал што докторите не верувале дека ќе преживее. По раѓањето родителите забележале дека Мајкл не се развива со иста брзина како Ештон, а по кратко време дознале дека боледува од церебрална парализа. Неколку години подоцна, на Мајкл морало да му се трансплантира срце. Тоа бил тежок период за семејството Kачер.

Ештон секогаш се поставувал заштитнички кон својот брат, а кога на 13-годишниот Мајкл му била потребна трансплантација на срце, Ештон сакал да биде донор, бидејќи за 48 часа не успеале да најдат соодветен. Сепак, на крај бил пронајден донор, виталниот орган бил пресаден на време, а браќата оттогаш станале уште поблиски.

Повеќепати Ештон има зборувано дека тоа му бил еден од најтешките периоди во животот и дека бил подготвен да стави крај на својот живот за да го спаси братот.

Мајкл денес е оженет, има два сина и е успешен мотивациски говорник, a со своите говори од лично искуство ги охрабрува младите луѓе никогаш да не се обесхрабруваат.