Тоа беше првиот од двете закажани пријателски средби меѓу Наполи и Барселона во САД, а нов одличен настап за италијанскиот вицешампион имаше Елиф Елмас.

Македонскиот репрезентативец Елмас покажа добри перформанси и против каталонскиот гигант во чии редови поради повреда не настапи првата ѕвезда Лионел Меси.

Нашиот интернационалец беше заменет од Гаетано во 57 минута од средбата. Поведе шпанскиот првак со голот на Бускетс (38`), а четири минути подоцна Умтити си постигна автогол.

Непосредно пред да биде заменет, Елмас доби незгоден удар од Бускетс, па мораше брзо да реагира лекарскиот тим, но се надеваме ништо не е посериозно.

После откако беше заменет Елмас, следуваше ново водство за Барса, поточно во 79 минута Хрватот Ракитиќ го обезбеди триумфот.

Двете екипи за време на турнејата на американскиот континент ќе одиграат уште еден меѓусебен пријателски меч кој е закажан за ноќта меѓу 10 и 11 август.