Донев и Ковачевски договориле работна средба на министрите за внатрешни работи и безбедносните служби за мирно чествување на 4 февруари
Бугарскиот технички премиер Галаб Донев оствари телефонски разговор со премиерот на Република Северна Македонија Димитар Ковачевски и двајцата разговарале за потребата од мирно и без проблеми одвивање на претстојните празнувања на 151-годишнината од раѓањето на големиот револуционер Гоце Делчев, пренесуваат бугарските медиуми.
-Во таа насока, во понеделник, на 30 јануари, вицепремиерот и министер за внатрешни работи Иван Демерџиев и претседавачот на ДАНС (Државна агенција за национална безбедност) Пламен Тончев ќе остварат работна средба со своите колеги во Скопје на која ќе ги прецизираат заедничките активности за обезбедување мирна и безбедна средина за прославата на 4 февруари, соопшти бугарската влада.
Премиерите Донев и Ковачевски разговарале и за придобивките од подлабоката соработка меѓу двете земји во областа на безбедноста, особено „во случаите на криминални дејствија или закани врз граѓани на Република Северна Македонија со бугарски идентитет“.
-Во разговорот, премиерот Донев повторно потсети на очекувањата од Бугарија, Република Северна Македонија да ги преземе неопходните активности за ставање крај на говорот на омраза и злосторствата, како и за почитување на правата на македонските Бугари, стои во соопштението од бугарската влада кое го пренесуваат бугарските медиуми.