Во текот на вчерашниот ден ЈП „Државни патишта“, постапувајќи по барањето на јавниот обвинител од Основното јавно обвинителство за гонење на организиран криминал и корупција, го достави договорот за изведба и надзор над изградбата на коридорите 8 и 10-Д, соопштија од Обвинителството.

Претходно, претпријатието доставило и броеви на огласите од јавните набавки поврзани со коридорите 8 и 10-д, за кои јавниот обвинител обезбеди пристап до електронската база на податоци на Бирото за јавни набавки.

Во наредниот период, како што најавија, договорот ќе биде анализиран во насока на утврдување на елементи на евентуално сторено кривично дело.

Со оглед дека станува збор за обемна документација на јавниот обвинител и тимот на истражители ќе им биде потребно време за анализа и проверка на сите индиции и наводи што месеци наназад се во интерес на јавноста. За секое постапување што нема да ја попречи постапката и ќе може да се сподели со јавноста, обвинителството навреме ќе информира, се вели во соопштението.