Ракометната репрезентација на Македонија вечерва доживеа дебакл губејќи со 38:19 од Египет во второто коло на Светското првенство кое се игра токму во земјата на „фараоните“.

Ракометарите по две кола имаат гол разлика од минус 31 по дуелите со Шведска и со Египет, а поразот од домаќинот на Мундијалот е вториот најголем во историјата на репрезентацијата на големите натпреварувања.
Македонија на светската ракометна мапа се појави токму на Мундијалот во Египет 1999 година, и до денеска најубедливиот пораз на Светските првенства го претрпе токму пред 22 години.

Македонија тогаш загуби од Куба со 14 гола разлика 18:32 и тоа беше најубедлив пораз на Мундијалите.
Но, најубедливиот пораз, ракометарите на големо натпреварување го забележаа една година порано (1998) кога дебитираа на Европското првенство во Италија. Македонија тогаш во последното коло загуби од Чешка со 38:18, а интересно е што актуелниот селектор Данило Брестовац беше актер и на тој пораз. Тогаш Брестовац заедно со Шандор Ходик беа голмани на репрезентацијата.