На денешната конститутивна седница на Советот на  Град Скопје беа потврдени мандатите на 44 избрани советници, кои во наредните четири години ќе ги носат сите одлуки важни за град Скопје. За претседетел на Советот, на предлог на советничката група на ВМРО-ДПМНЕ е избран Даме Димитровски, кој беше носител на нивната листа на изборите, а во претходните четири години беше претседател на Управниот одбор на ЈП „Дрисла“.

 Денес стојам со цврста одлука да бидам претседател на сите советници без разлика на нивната политичка припадност, да бидам и глас на разумот и посредник во дијалогот кога тоа ќе биде потребно и да бидам гаранција дека градското собрание ќе ја врати повторно довербата на граѓаните – рече претседателот на Советот по изборот, нагласувајжи меѓу другото, дека ќе биде претседател на дијалогот, не на поделбите.

Предлогот тој да биде избран на оваа функција беше поддржан од советничката група на СДСМ, во чие име говореше Катерина Цаневска Арсовска, која истакна дека даваат поддршка, но сепак ќе гласаат воздржано и како што рече,  очекуваат конструктивна соработка со сите советнички групи.

Од ваквиот став се иззема советникот Горан Симоновски од СДСМ, кој од говорницата рече дека од ВМРО-ДПМНЕ добиле предлог на човек што раководеше со „Дрисла“, претпријатие кое во изминатиот период беше еден од најголемите загадувачи на Скопје,  и иако таму не се покажал,  сега ВМРО -ДПМНЕ ќе го награди со функција.

Гласањето за овој предлог ќе биде потсмев за сите што имаат здравствени проблеми, за сите родители што ги носеа децата по болници и затоа јас ќе гласам против – рече Симоновски.

Инаку, денешната конститутивна седница ја отвори Ристо Пенов, како највозрасен член на новиот Совет, а од говорницата на советниците им се обрати и градоначалникот Орце Ѓорѓиевски.

Овој Совет избран со доверба од граѓаните има историска задача да го насочи Скопје кон стабилен, функционален и одржлив развој, да покажеме дека кога политиката пред се ќе ги стави интересите на граѓаните, резултатите се видливи, конкретни и трајни. Немаме време за експерименти туку мораме сите заеднички да се зафатиме за работа и тоа веднаш. Како градоначалник мојата цел е да создадеме град кој ќе биде пример за ред, чистота, транспарентност и современ урбан развој- рече Ѓорѓиевски.

Говорејќи за клучните работи на кои ќе се фокусираат во наредниот период, градоначалникот им порача на советниците дека заедно со него имаат клучна улога – без оглед на политичката припадност  да го направат Скопје подобро место за живеење.

Очекувам овој Совет да биде извор на идеи и решенија, а не на поделби. Да покажеме дека знаеме да соработуваме кога станува збор за интересите на нашиот народ, нагласи градоначалникот.