Утревечер и задутре во Штип се одржува 35-то јубилејно издание на Фестивалот на забавни мелодии „Макфест 2020“. Првата вечер е ревијална и ќе се отпеат најголемите хитови од Макфест низ историјата на фестивалот, а задутре со почеток од 20:30 со директен пренос на МТВ ќе се натпреваруваат нови 24 композиции.

Фестивалот годинава поради корона пандемијата ќе се одржува на отворено на плоштад „Слобода“ во Штип. Помеѓу учесниците се и „милениците на публиката“, дуото Драган Спасов Дац и Александар Митевски кои ќе ја исполнат нивната нова песна „Ѓавол да те земе“.

Дац и Александар и минатата година настапија со нивниот хит „Уште ми фалиш“ и го освоија второто место, а песната беше дефинитивно најслушаната помеѓу двата фестивала. Оваа година популарното дуо е во придружба на дувачкиот состав Brasstet Skopje, а веќе во понеделник на 21 септември во клубот Tribeca во Скопје го промовираат и видео спотот на макфестовската „Ѓавол да те земе“, во продукција на Пикадо.

Дац и Александар по својот концерт во август на Античкиот театар во Охрид имаа серија настапи низ државата, а по Макфест ќе продолжат со својата „љубовна турнеја“ на барање на фановите.