Градоначалникот на Општина Центар Горан Герасимовски најави дека ќе се наводнуваат садниците и ќе се мијат улиците и контејнерите низ општината, особено за време на екстремно високите температури. Вчера со цистерна се миеја улиците и контејнерите зад Универзалната сала во населба Буњаковец и кај основното училиште „Јохан Хајнрих Песталоци“, а денеска ќе се продолжи низ Дебар Маало.

Години наназад не ги гледаме градските цистерни по улиците кои ја миеја прашината и ги освежуваа улиците. Прашината која не ја гледаме, но ја дишеме всушност е дел од севкупното загадување и затоа е неопходно нејзино миење. Цистерната на ЈП „ПОЦ“ секое утро и попладне особено за време на овој бран со екстремно високи температури ќе поминува во сите населби и ќе ги мие локалните улици – рече Герасимовски.

Цистерната на Општина Центар ги миеше улиците и минатата недела кога градоначалникот Герасимовски најави самостојно чистење на општината поради застојот на работата во градското претпријатие „Комунална хигиена“.