Четири автокампа се пријавиле за ваучерски туризам
Автокамповите со различно толкување на протоколите – дали во еден бунгалов или во приколка е можно сместување само на членови од семејство или не.
Од 11 автокампа во Македонија, до денеска 4 автокампа се пријавиле дека ќе примаат гости што ќе плаќаат со ваучери за домашен туризам, велат од Министерството за економија. Утре, пак, е последниот рок до кога туристичките капацитети можат да побараат да учествуваат во проектот „Дома си е дома“.
Според информациите што ги добивме од Министерството, барање за ваучерскиот туризам поднеле автокамповите „Ливадиште“ и „Ас“ од Струга, „Автокамп 2020“ од Охрид и автокампот „Отешево“ од Ресен. На листата ги нема познатите камперски места „Градиште“ и „Љубаништа“, но интересно е што иако го нема и автокампот „Крани“ од Преспа, тој веќе објавува реклами во кои ги поканува имателите на ваучери за туризам да дојдат на одмор во ова одморалиште. Тоа го проверивме и телефонски каде што љубезно ни одговорија дека може да престојуваме и да платиме со ваучер. Од друга страна, пак, во „Ливадишта“ беа воздржани и ни кажаа дека ќе има можност да се плаќа со ваучер, но дека тоа ќе го објават кога официјално ќе биде објавена листата на капацитети што учествуваат во проектот „Дома си е дома“. Оваа листа ќе биде објавени на 5 јули.
Според информациите што ги добивме од камповите, сместувањето во четирикреветни бунгалови со сопствен тоалет и кујна е од 1.500 до 1.800 денари дневно, а сместувањето во приколките, во зависност од временскиот период и од кампот е од 500 до 1.200 денари дневно.
Она што е особено интересно во однос на кампувањето е прашањето: Кој може да се смести во еден бунгалов? Додека во Протоколот за работа на угостителски објекти за сместување (хотели и други угостителски објекти за сместување) е наведено дека „во сместувачките капацитети со повеќе кревети можно е сместување само на гости од едно домаќинство, коишто ќе го докажат тоа при пријавувањето“, во Протоколот за работа на автокамповите, вакво нешто не е прецизирано, туку пишува: „Да се почитуваат мерките за максималниот дозволен број лица во затворени простори (како објекти, камп-приколки, детски клубови, спортско-рекреативни објекти)“.
Ова во камповите различно го толкуваат. Така, во „Крани“ се јавивме како заинтересиран граѓанин за летување во бунгаловите и бидејќи се тие со две соби, прашавме дали е можно два пара да летуваат во ист бунгалов и добивме негативен одговор, односно дека тоа е спротивно на мерките на Владата. Но во автокампот „Извиднички центар“ – Охрид ни кажаа дека четворица од различно семејство може да престојуваат во еден бунгалов. Во Протоколот за автокамповите пишува дека меѓу лежалките на плажа, меѓу столовите во рестораните и меѓу камперите треба да има растојание од 1,5 до 2 метри, а пропишани се и мерките за прием, дезинфекција, информирање…
Инаку, според податоците што денеска ги добивме од Министерството за економија, за ваучерски туризам се пријавиле 492 туристички капацитети, а се одобрени 325, додека за 8 се чека дополнителна документација.
Ваучери за туризам по 6.000 денари добиваат граѓаните со плати до 15.000 денари, така што во едно семејство вакви ваучери може да добијат повеќемина.