Чествување за Блаже Конески на УГД во Штип: Македонскиот јазик најдобро се чува низ живата реч

По повод јубилејот – 100 години од раѓањето на македонскиот великан Блаже Конески во текот на целата година се одржуваат настани во рамки на „2021 – Година во чест на Блаже Конески“, а настан се одржа и во Универзитетот „Гоце Делчев“ во Штип.

Македонскиот јазик најдобро се чува низ живата реч и со книжевната архива што ја создаваат македонските автори. Вака говореа професорите на Филолошкиот факултет при Универзитетот „Гоце Делчев“ (УГД) во Штип, каде беа одбележани Денот на македонскиот јазик и стогодишнината од раѓањето на Блаже Конески, а белешки за настанот ни испрати новинарката Сузана Мицева.

– Она што досега е создадено на македонски јазик е ризница која го сведочи неговото постоење, неговата убавина и посебност – истакнала деканката на Филолошкиот факултет во Штип, д-р Драгана Кузмановска. Таа смета дека македонскиот јазик и Конески се нераскинлив дел од македонската посебност, тие ја дефинираат. Зашто, токму Конески-корифејот на македонската книжевно-научна мисла, е човекот кој застана на браникот на јазикот и татковината тогаш кога беше најсилно оспоруван и негиран.

– Нашата традиција е долга, корените ни се длабоки, имаме долг и обврска да го чуваме и негуваме македонскиот јазик како најсвета оставина од нашите предци. Блаже Конески токму тоа сакаше да нѐ научи и преку стихот и преку научната мисла. Затоа како генерација мораме да веруваме и да ја шириме неговата знаменита мисла дека „јазикот е единствената наша комплетна татковина“ – заклучила Кузмановска.

Атанас Конески со д-р Драгана Кузмановска, деканка на Филолошкиот факултет во Штип

Д-р Ана Витанова-Рингачева, професор и раководител на Катедрата за македонски јазик и книжевност на Филолошкиот факултет при УГД во Штип, одржала беседа за Конески. Таа, во својата реч, Конески го нарекува чувар на духот на нашиот културен континуитет. За неа тој е поетот кој силно нурна во мракот на сите наши колективни и лични стравови, трауми и премрежја, оној кој со стих се обиде да ги заузда сите разбеснети буици. Витанова-Рингачева истакнала дека Конески преку својот силен збор „макар на непризнат јазик“, нѐ издигна високо, нѐ поткрена за да го видиме светот.

Изминатите дваесет години, ликот и делото на Блаже Конески се чуваат и преку дејствувањето на Фондацијата за македонски јазик „Небрегово“, којашто го носи името по неговото родно место. А неговото дело се проучува, но и продлабочува и дополнително вреднува низ континуираната работа на неговите наследници, книжевниците и научниците-следбеници на Конески. Токму годинава, кога се обележува јубилејот 20 години Фондација „Небрегово“, но и еден век од раѓањето на Конески, и кога македонскиот јазик е повторно изнесен на мегдан за докажување, Фондацијата ја реиздаде книгата „По повод најновиот напад на нашиот јазик“, којашто првично е објавена во 1948 година. Секретарот на фондацијата „Небрегово“, Атанас Конески нагласи дека книгата е наменета, пред сѐ, за книжевниците и научниците, да се потсетат на аргументираната битка на Конески за македонскиот јазик и да влечат нови паралели и поткрепи во своите научни тези за континуитетот на македонскиот јазик.

– Блаже Конески и неговото дело се повеќе од реченото и напишаното, бидејќи засекогаш останува живиот спомен за него и неговата бесмртност, а славата на бесмртните е бесконечна – истакнал Атанас Конески.

Фондацијата „Небрегово“ доделила по еден примерок од книгата „Македонски јазик: идентитет и континуитет – доискажување“ на Трајко Стаматоски, донација од издавачката куќа „Култура“ од Скопје, на ученици од основните и средните училишта и студенти од источниот дел на Македонија, кои учествуваа на литературниот конкурс „Поетски пораки за Конески“.

(Текстот е објавен во „Културен печат“ број 80, во печатеното издание на „Слободен печат“ на 15-16 мај 2021)

Видео на денот