Италијанскиот министер за спорт, Винченцо Спадафора,озјави дека челниците на екипите реагирале бурно на одлуката фудбалот во Италија да се суспендира на месец дена поради епидемијата на коронавирусот.

– Состојбата се менува од час во час и така и ние ги носиме одлуките. Никој од нас не знае што може да се случи денеска, а не пак да правиме долгорочни плаови. Единствено што е сигурно е дека во овие моменти не смее да има себичност која деновиве ја видов кај фудбалските функционери – изјави Спадафора и потоа додаде:

– Моравме да преземеме одговорност и да донесеме одлука фудбалот во Италија да се запре. Не ни беше лесно да се одлучиме на тој чекор, но властите не советуваа во таа насока. Нашата цел е здравјето на луѓето да биде најважно, но не наидовме на поддршка кај луѓето од светот на фудбалот. Одредени претседатели на клубови ми се јавуваа, ми врескаа по телефон и ми се закануваа доколку се одлучиме на тој чекор. Потоа, еден или два дена подоцна кога подетално увидоа колку е сериозна состојбата со коронавирусот, самите ми се јавуваа и бараа фудбалот да се запре.

Министерот е свесен дека прекинот на сезоната ќе има големи последици за целиот спорт, па така и за фудбалските екипи.

– Состојбата со епидемијата ќе остави трајни последици на сите сегменти во животот во Италија, па така и во фудбалот. Фудбалската федерација на Италија и клубовите ќе имаат големи финансиски загуби, но во овие околности паузата беше неопходна бидејќи здравјето е над се – порача Спадафора.