Централната банка на Русија денеска ја зголеми референтната каматна стапка од 9,5 на 20 отсто годишно, со цел да се спротивстави на ризиците од губење на вредноста на рубљата и зголемувањето на инфлацијата.

„Надворешните околности за руската економија драстично се променија. Подигнувањето на основната стапка ќе овозможи зголемување на каматните стапки на депозитите до нивото потребно за неутрализирање на ризиците од растечката опасност од девалвација и инфлација. Ова ќе ја поддржи финансиската и ценовната стабилност и ќе ги заштити заштедите на граѓаните од девалвација“, се вели во соопштението на Банката на Русија.

Ова е највисокото ниво на референтни каматни стапки што Русија некогаш го имала. Претходното рекордно ниво од 17 отсто беше забележано во декември 2014 година.

Банката на Русија во неделата објави серија мерки за поддршка на домашниот пазар на капитал, со цел да се контролираат растечките последици од острите западни санкции воведени против Москва поради нападот врз Украина.