Бугарија ќе го тргне ветото за Македонија, најавува бугарски „24 часа“
Во текот на следната недела се очекува компромис за спорот меѓу Македонија и Бугарија, така што Софија ќе добие гаранција дека во секое време ќе може да ја блокира Македонија откако земјава ќе ги почне преговорите, најавува бугарскиот весник „24 часа“.
Како што пишува медиумот, идејата на влијателни европски политичари е „да ѝ се гарантира на Бугарија дека нема повеќе да биде измамена“, но и на Скопје дека нема да ја изгуби шансата за полноправно членство во ЕУ.
„Бидејќи повеќето наши барања, како што е отстранувањето на говорот на омраза во учебниците, не се нешта што се случуваат веднаш, Бугарија ќе има право на вето во секое време. Тоа може да се случи ако сите спорни прашања бидат вклучени во патоказот за членство на Македонија, што ќе го одобри Советот на ЕУ. Така, во случај на непочитување на договорите или неисполнување на која било од обврските, Софија во секое време ќе може да наметне вето“, пишува весникот.