Родителите на рускиот тенисер Данил Медведев нема да бидат во можност да го бодрат својот син на завршниот Мастерс во Лондон. Британската влада не им издаде виза на мајката и таткото на Данил Медведев.

Таткото на четвртиот тенисер на АТП листата, Сергеј Медведев изјави дека тој и сопругата уште на 28 октомври ја предадоа целата документација за виза во англиската амбасата во Париз и дека платиле дополнителна сума на пари за да се забрза процесот на издавање на визите.

– Поминаа девет работни дена и ништо. Ги загубивме резервациите за летот за Лондон, исто така ги загубивме и парите кои ги уплативме за визите, а плативме и дополителна сума за нашите апликации да бидат разгледани по брза постапка. Поради неизвесноста можам да кажам дека освен материјална штета претрпевме и голем стрес, а најтешко за нас и што синот остана без помошта од најблиските – изјави Сергеј Медведев.