Во третиот натпревар од групата „А“ од претквалификациите за Евробаскетот 2029 година, машката кошаркарска сениорска селекција на Македонија извојува победа над Луксембург од 79:70.

И по три одиграни кола, „црвено-жолтите“ имаат максимален ефект, три игри, три победи, доволно за прво место на табелата.

Ова беше и триумф на дебито на новиот селектор Жозеп Марија Берокал:

– Победата е важна за почетокот на овој проект. Не смееме да заборавиме дека сме заедно само четири дена што не е лесно и за мене како тренер и за тимот. Имаше добри работи, како трчањето и одбраната. Но имавме и падови во играта што не смеат да ни се повторат.

Им честитам на играчите поради тоа што немавме доволно време да се вклопиме. Сакам да играме добра одбрана, не е лесно да се игра 40 минути на тоа ниво, но тоа е нашата цел. Задоволен сум од пристапот на играчите бидејќи главно го исполнија она што го побарав од нив. Треба само да го зголемиме бројот на добри минути во играта, да ја движиме подобро топката и да играме како тим, а не индивидуално – рече Берокал по натпреварот.