Берлин ја поздрави поддршката на Пекинг за реструктуирање на долгот на Г20
Германија ја поздрави поддршката од страна на Кина која таа ја понуди за реструктуирање на долгот на Г20 за посиромашните земји во заедничката изјава по нивниот финансиски дијалог во Франкфурт за време на викендот, пренесува Ројтерс.
„Го поздравуваме фактот дека и кинеската страна е посветена на ова во нашата заедничка изјава, бидејќи решенијата се незамисливи без Кина како толку важен играч во светската политика“, рече во неделата германскиот министер за финансии Кристијан Линднер, по неговиот состанок со кинескиот вицепремиер Хе Лајфнг.
Ниту еден не даде дополнителни детали околу правилата за плановите за реструктуирање и во заедничката изјава не се дадени конкретни детали.
Некои земји, како што е Германија, тврдат дека со оглед на тоа што Кина е убедливо најголемиот доверител за многу високо задолжени земји во Африка и Азија, Пекинг треба да направи отстапки за да го забрза реструктуирањето на долгот.
За време на разговорите во неделата, Германија и Кина, исто така, ја покажаа својата решеност да ги прошират можностите за пристап до пазарот меѓу двете земји.
„Ова создава можности на двете страни за поодговорна трговија и инвестиции“, рече во неделата германскиот министер за финансии Кристијан Линднер.
Кина е подготвена да работи со Германија за понатамошна „заемна корисна“ соработка и да внесе повеќе „позитивна енергија“ во нивното партнерство, објави во неделата официјалната новинска агенција Синхуа, цитирајќи го Хе.
На третиот финансиски дијалог меѓу Берлин и Пекинг присуствуваа високи претставници на централните банки и надзорните органи на земјите, како и претставници на неколку компании.
„За мене е важно да нагласам дека за прв пат во историјата на финансискиот дијалог формиравме Финансиска тркалезна маса со претставници на важни финансиски институции и приватни компании“, рече Линднер.
Линднер предложи да се зголеми зачестеноста на финансиските дијалози меѓу Кина и Германија, овие состаноци да се одржуваат годишно наместо на секои две години, бидејќи и двете земји сакаат побрз напредок. „Во политиката, две години се долго време, но во финансиските прашања, две години се вечност“, рече Линднер.
Состанокот се одржа во Франкфурт, бидејќи Германија сака дополнително да го зајакне овој град како европски центар за финансиски услуги, рече министерот за финансии.