Арсовска го разреши директорот на Комунална хигиена, чијшто брат пукаше со пиштол на плоштадот „Скендербег“
Град Скопје вечерва преку соопштение информира дека Зуди Енузи е разрешен од позицијата в.д. директор на јавното претпријатие „Комунална хигиена – Скопје“.
Ова доаѓа по информацијата дека неговиот брат, Цуфи Кока, е човекот кој мавташе и пукаше со пиштол на плоштадот „Скендербег“ за време на денешните протести против францускиот предлог.
„Градот Скопје како град на соживот и солидарност не смее да биде центар на насилство и пресметки со огнено оружје и креирање меѓуетнички тензии меѓу нашите сограѓани. Политиката зема замав и во ниту еден случај не смее да влијае на професионалноста на водењето на институциите. И покрај одличното и професионално менаџирање со јавното претпријатие ‘Комунална хигиена’ од страна на Зуди Енузи, сепак мојот етички кодекс не дозволува тој да продолжи да раководи со претпријатието. Затоа тој е разрешен од позицијата“, се вели во соопштението од кабинетот на градоначалничката на Скопје.
Според објави на Фејсбук на Цуфи Кока, тој е активист на Алијанса за Албанците, коалиционен партнер на ВМРО-ДПМНЕ во Скопје, а бил главен за кампањата на Арсовска во Чаир на минатите локални избори.
Одговарајќи на новинарско прашање за политичката припадност на приведениот, Мицкоски на вечерашната прес-конференција рече дека не го интересира дали е член или не на Алијанса за Албанците и побара да не се политизира работата.
„Да не ја политизираме работата. Да бидеме над политиката и да бидеме над оние политичари кои повикуваа на етнички тензии. Дали е член или не е, не ме интересира. Овој човек стори криминал, впери пиштол кон народ и треба да одговара“, рече Мицкоски.
Пратеникот и портпарол на СДСМ Дарко Каевски на прес-конференција веднаш по онаа на Мицкоски кажа дека инцидентот кај плоштадот Скендербег е смислено крваво сценарио на Мицкоски и ВМРО-ДПМНЕ, Левица и Алијанса за дестабилизација и инсценирање на меѓуетнички судир во земјава. Тој кажа дека Кока бил главен за кампањата во Чаир на градоначалничката на Скопје Данела Арсовска поддржана од ВМРО-ДПМНЕ.